Монголын аврагчид гурван хүний амийг аварчээ

Admin | 2023-02-08

   Монгол Улсаас ОБЕГ-ын дэд дарга, бригадын генерал Б.Ууганбаяраар ахлуулсан эрэн хайх, аврах баг болон эмч нарын 35 хүний бүрэлдэхүүн энэ сарын 8-ны үүрээр Турк улсыг зорьсон. Мөн аврагчдын бүрэлдэхүүнд Марта болон Балу нэртэй гурав, дөрвөн настай үнэрч хоёр нохой багтсан. Манай аврах багийнхан очсон даруйдаа ажиллагаанд оролцоод эхэлсэн. Манай улсын аврах багийнхан энэ сарын 8-ны өдөр Газиантеп хотод газардсан. Монгол Улсын баг гамшгийн голомтот Хатая мужаас аврах ажиллагаагаа хийж буй. Эхний өдөр аврах ажиллагааг орон нутгийн цагаар 20:00 цагаас эхлүүлж 02:00 цаг хүртэл ажилласан байна. Энэ үеэр хоёр хүүхэд, нэг том хүнийг эсэн мэнд аварсан тухай сайхан мэдээ ирүүлжээ. Тодруулбал, 20:10 цагт хоёр настай нэг хүүхэд, 21:50 цагт нэг эмэгтэйг, 22:33 цагт 15 настай хүү гурвыг орон сууцны нурангиас эсэн мэнд гарган авч эмнэлгийн анхны тусламж үзүүлэн улмаар дараагийн шатны эрүүл мэндийн төвд нь хүлээлгэн өгчээ. Турк улсыг зорьсон эрэн хайх, аврах багийн 11 гишүүн нь зэвсэгт хүчний албан хаагчид. Тус багийг Зэвсэгт хүчний 350 дугаар ангийн захирагч, хурандаа Ж.Сүх-Очир ахалж, эмнэлгийн талаас Цэргийн төв эмнэлгийн Аврахуйн анагаах ухаан эрхэлсэн орлогч дарга, дэд хурандаа Л.Лувсандорж удирдаж буй.
Байгалийн гамшигт өртсөн Туркийн ард түмэнд туслаж, олон орны аврагчид тэнд ажиллаж байгаа билээ.  Дэлхийн 40-өөд орны аврагчидтай Монголын аврагчид мөр зэрэгцэн, газар хөдлөлтөд нэрвэгдсэн туркчуудад туслаж буй. Мөн тэнд дэлхийн шилдэг үнэрч ноход аврах ажиллагаанд оролцож буй. Барилга, байшингийн нуранги дороос хэн нэгнийг олоход аврагч нохойн үүрэг их. Балу, Марта нэртэй хоёр нохой байгалийн гамшигт өртсөн Туркийн ард түмэнд туслахаар манай 35 аврагчийн хамт эх орноосоо ниссэн. Балу гурван настай. Онцгой байдлын ерөнхий газарт хоёр жил аврах үүрэг гүйцэтгэжээ. Түүнийг "Маугли" гэх хүүхэлдэйн киноны баавгайтай адилхан учир эзэн нь ийнхүү нэрлэжээ.   Анх удаа гадагшаа нисч, анх удаа газар хөдлөлтөд нэрвэгдсэн хүмүүст тэр туслах юм. Түүнд энэ нь туршлага, эзэнд нь чадвар хуримтлуулахад нэг талаар нэмэр болно.

М.ХҮСЛЭН