Украинчуудад олзлогдсон цэргүүд CNN-д "Вагнер"-ын хохирлын талаар ярьжээ 

Admin | 2023-02-12

   Украины цэргийнхэнд олзлогдсон ОХУ-ын “Вагнер” зэвсэгт бүлэглэлийн хоёр гишүүн АНУ-ын CNN телевизд байлдааны ажиллагааны үеэр Оросын арми маш их хохирол амссаныг, “Вагнер”-ын цэргүүдийг дарга нар нь шууд бууддаг тухай ярьсан байна. CNN аюулгүй байдлын үүднээс олзлогдсон хоёрын нэрийг нууцалжээ. Сэтгүүлч Украины цэргийн албан хаагчдын оролцоотой тэдэнтэй ярилцсан байна. ОХУ-ын хоёр иргэн 2022 оны эцсээр олзлогджээ. Хоёулаа олон жилийн хорих ялтай. Нэг нь хүн амины хэргээр 20 жилийн ял сонссон нэгэн гэнэ. Тэд Луганск мужийн Белогоровка тосгон руу яаж дайралт хийсэн тухай ярьж өгчээ. Тэдний ярьснаар, нэг бүлэгт хамт байсан 90 хүний 60 нь их бууны дайралтад өртөж амь үрэгдсэн байна. Их хэмжээний хохирол амссанаар тэд цаашаа довтлох боломжгүй болжээ. “Хэрэв нэг отрядын дайралт бүтэлгүйтвэл, өөр нэгийг явуулна. Тэдний дайралт амжилт олохгүй бол гурав дахь отрядыг явуулна” гэж тэд өгүүлсэн аж. Тушаалыг билелүүж чадахгүй ухарсан хүмүүсийг дарга нар газар дээр нь шууд бууддаг байсан гэнэ. Дайтахаас татгалзсан нэг цэргийн булшийг өөрөөр нь ухуулжээ.  
Олзлогдсон хоёрын ярьснаар, дайны талбарт шархадсан хүмүүсийг хэн ч авч явахгүй бөгөөд тэд өөрсдөө очих газраа хүрэх ёстой. Тэдний “Вагнер” бүлэглэлд Евгений Пригожин өөрөө элсүүлсэн байна. Зургаан сарын дараа өршөөл үзүүлж, ялыг нь арилгаж, өр зээлээ төлөхөд нь туслахыг амлажээ. Мөн тэдэнд “Украины цэргүүд зугтсан, та нар Польш болон Германаас ирсэн хөлсний цэргүүдийг устгах болно” гэж ойлгуулжээ. ОХУ-ын “Вагнер” хувийн цэргийн компанийг үүсгэн байгуулагч Е.Пригожин ч, бүлэглэлийн бусад удирдагчид ч ямар нэгэн тайлбар хийсэнгүй. “Вагнер” бүлэглэл ОХУ-ын Батлан хамгаалахын яам ч юм уу бусад орны төрийн байгууллагуудтай ямар нэгэн хамааралгүй цэргийн байгууллага. Уг албан бус бүлэглэл Сири болон Африкт болж буй мөргөлдөөн ба Украины дайнд оролцож байгаа. “Вагнер” бүлэглэл эгнээндээ онц хүнд гэмт хэрэгт ял шийтгүүлсэн хүмүүсийг олноор элсүүлдэг.  

М.ХҮСЛЭН