ОХУ ба Хятадын харилцааны шинэ эрин эхэллээ

Admin | 2023-03-23

Оросын төрийн тэргүүн Владимир Путиныг Гаагын Олон улсын эрүүгийн шүүхээс (ICC) баривчлах шийдвэр гарсны дараа БНХАУ-ын дарга Ши Жиньпин Москвад айлчилсан гээд манай орны хоёр  хөршөөр сонин сайхан дүүрэн болов.

Ши Жиньпиний Москвад хийсэн дээд хэмжээний албан ёсны айлчлал нь хоёр орны хязгааргүй түншлэлийн харилцааны гол үйл явдал болж байна. Түүнчлэн хоёр орны удирдагчдын Украины дайн эхэлснээс хойших анхны биечилсэн уулзалт аж. Уулзалтын уур амьсгал, талуудын харилцаа найрсаг байсан төдийгүй стратегийн хэд хэдэн чухал гэрээг үзэглэв.

Шинэ эрин: Дайн гарснаас хойш Хятад-Оросын эдийн засгийн томоохон багана болсныг хоёр орны гадаад худалдаа өнгөрсөн онд 190 тэрбум ам.долларт хүрч дээд амжилт тогтоосноос харж болно. Энэ ч утгаараа ирэх 10 жилд хоёр улс иж бүрэн, стратегийн хамтын ажиллагааг гүнзгийрүүлэх тухай хамтарсан мэдэгдэл гаргасан билээ. Улмаар тэд энэ жилийн худалдааны эргэлтээ багадаа 200 тэрбум ам.доллар байхаар төлөвлөжээ.

Улс төрийн хүрээнд: Ши Жиньпин барууны зүгээс ОХУ-д тавих хоригийг эсэргүүцэж, Украины асуудалд энхийн хэлэлцээрийг дэмжиж байгаагаа илэрхийлсэн. Харин Оросын талаас Тайваны тусгаар тогтнолыг ямар ч хэлбэрээр эсэргүүцэж байгаа аж.

Эрчим хүч: Тэд хамтын ажиллагааны хүрээнд эрчим хүч, тээврийн салбарт 165 тэрбум ам.долларын үнэ бүхий 79 төслийг хэрэгжүүлэхээр болсон. Мөн Монголыг дамжин өнгөрөх “Сибирийн хүч-2” хийн хоолойн асуудлыг хэлэлцэв.

Сибирийн хүч-2: Сибирийн хүч-2 хийн хоолой нь Хятад болон Оросын стратегийн түншлэлийг бэхжүүлэх чухал ач холбогдолтой бүтээн байгуулалт. Энэ ч утгаараа тэд газрын тос, байгалийн хий, нүүрсний төслүүдийг урагшлуулж эрчим хүчний илүү нягт түншлэлийг бий болгоно гэж мэдэгдэв. Тухайлбал, В.Путин энэ онд хамгийн багадаа 98 тэрбум шоо метр байгалийн хий Хятадад нийлүүлэхээ амласан юм.

Юутай ч манай хоёр хөрш хийн хоолойгоор дамжуулаад илүү дотно түншилнэ гэдгээ зарлаад байна. Харин манай улсын төр засаг Сибирийн хүч-2 хийн хоолой болон байгаль орчин гээд асуудлуудаа тооцоолсон л байгаа.