Багш нар хэдэн төгрөгийн цалин авдаг вэ?

Admin | 2023-04-07

Боловсролын салбарын багш ажилтнууд цалин хөлсөө нэмэгдүүлэхийг шаардаж өчигдөр Сүхбаатарын талбайд жагссан. "Монголын Боловсрол, Шинжлэх ухааны салбарын Үйлдвэрчний эвлэл"-ээс зохион байгуулсан тус жагсаалд нийслэлийн бүх шатны боловсролын салбарын төлөөллүүд оролцсон. “Боловсролын салбарт ажиллаж буй хүмүүсийн цалин хөлс бага, нийгмийн баталгаа хангалтгүй, ажил хөдөлмөр сайн үнэлэгдэхгүй байгаа учраас жагсаал цуглаан хийж байна” гэж байв. Багшийн цалин хөлсийг 50 хувиар нэмэх, Боловсролын тухай хуульд багш нарын суурь цалинг гурав дахин нэмэгдүүлэх, төрийн үйлчилгээний ажилчдын цалинг хөдөлмөрийн хөлсний доод хэмжээнээс гурав дахин өсгөх гэх мэт шаардлагыг тавьжээ.

Мөн Боловсрол шинжлэх ухааны яам, Монголын Боловсрол, шинжлэх ухааны Үйлдвэрчний эвлэлийн холбооны 2022-2023 онд байгуулсан “Хамтын хэлэлцээр”-ийн биелэлт хангалтгүй байна гэж үзсэн байна. Харин БШУЯ-ны зүгээс хамтын хэлэлцээрт тусгасан үүргээ биелүүлж өнгөрсөн хоёр жилийн хугацаанд салбарын багш нарын цалинг дунджаар 30 хувиар нэмэгдүүлсэн гэв. Мөн гүйцэтгэл, үр дүнд суурилсан санхүүжилтийн тогтолцоог нэвтрүүлэн мөрдөж байна гээд багш нарын цалин, хөлстэй холбоотой мэдээллийг сошиал хуудсанадаа нийтэлсэн байна.

-Монгол Улсын багш нарыг нас болон ажилласан жилээр нь ангилсан зурагт хуудаснаас 5 хүртэл жил ажиллаж байгаа буюу нэмэгдэл бага авах залуу багш нарын тоог харж болно. Багш нарын 75-аас дээш хувь нь тодорхой нэмэгдэл авдаг туршлагатай багш нар байна.

-2022 оны 12 дугаар сарын байдлаар дийлэнх багш нар 1,2-2 сая төгрөгийн цалин авчээ. Гэхдээ энэ мэдээлэлд гүйцэтгэл, үр дүнгийн урамшуулал багтаагүй гэдгийг онцолж байна. 

-Багш нар үндсэн цалингаас гадна цалингийн нэмэгдэл, нэмэгдэл хөлс, гүйцэтгэл үр дүнгийн урамшуулал авдаг.

-Мөн хичээл сургалтын үйл ажиллагааг сайжруулах, хувьсах зардлыг оновчтой хуваарилах зорилгоор багшийн үйл ажиллагааг дэмжих бусад зардлыг 2022 оноос эхлэн шийдвэрлэж байна. Үүнд эрүүл мэндийн, дата хэрэглээний, хичээл практикийн зэрэг зардал багтдаг.