Туркийн хүнд жингийн бөхчүүд Европт ноёрхож байна

Admin | 2023-04-24

Хорватын нийслэл Загреб хотод өнгөрсөн долоо хоногт бөхийн төрлүүдийн Европын аварга шалгаруулах тэмцээн болж өндөрлөв. Тэмцээний сүүлчийн өдөр сонгомол барилдааны хүчтнүүд дэвжээнд гарсан. 130 кг-д зодоглосон Туркийн хүнд жингийн нэрт бөх, олимпын мөнгө, хошой хүрэлтэй, дэлхийн таван удаагийн аварга Риза Каялп Европын 12 дахь түрүүгээ хүртлээ. Тэрбээр Европын аваргад 11 дэх удаагаа аваргалж байгаад бөгөөд 2015 онд Европын тоглолтод мөн түрүүлсэн билээ. Ингэснээр Босфорын тэнгисийн эргийн “сонгодог хүчтэн” Риза Каялп “Сибирийн баавгай” хочит, ОХУ-ын домогт бөх Александр Карелины тивдээ 12 удаа аваргалсан түүхэн амжилттай зэрэгцэв. Александр Карелины хэзээ ч эвдэгдэхгүй гэгдэж байсан амжилтыг 24 жилийн дараа ийнхүү Туркийн бөх давтаж байна.  

Чөлөөт бөхийн хамгийн хүнд жинд бас нэг турк бөх, олимпын аварга, ДАШТ-ий гурван түрүүтэй Таха Акгуль мөн түрүүлсэн. Т.Акгуль Загребт Европын аваргын 10 дахь алтан медалиа зүүсэн аж. Энэ нь чөлөөт бөхийнхний дунд тивийн аваргын титмийг хамгийн олон удаа хүртсэн үзүүлэлт.

Тэгвэл нутаг нэгт алдартнуудаас эмэгтэй чөлөөт бөхийн хүнд жингийн тамирчин ч хоцорсонгүй. Туркийн бөх Ясемин Адар Хорватын нийслэлд эмэгтэй чөлөөт бөхийн хамгийн хүнд жинд аваргалж, Европ тивийн аварга шалгаруулах тэмцээний зургаа дахь түрүүгээ хүртэв.   

Сонирхолтой нь Риза Каялп, Таха Акгуль болон Ясемин Адар нар тав дахь удаагийн Европын аварга шалгаруулах тэмцээнд хамтдаа дараалан түрүүлж байгаа бөгөөд Туркийн хүнд жингийн гурвалын энэ амжилтыг ойрын хугацаанд бусад орны тамирчид эвдэнэ гэдэг бэрх байх.  

Турк улсад хүнд жингийн бөхчүүдийн амжилтыг онцгойлон үнэлдэг. Хэрэв тив, дэлхий, олон улсын тэмцээнд хүнд жингийн түрүүг авсан бол бусад жингийн амжилтыг үл харгалзан бөхчүүдээ маш сайн зодоглолооо гэж үздэг аж.

Загребт туркийн бөхчүүд сонгомол барилдаанд багаараа тэргүүлсэн. Харин эрэгтэй чөлөөтийнхөн Азербайжан, Гүржийн дараа гуравт, эмэгтэй багийнхан Украины багийн араас хоёрт орсон билээ.