Tentsver.mn

Элчин сайд Чой Жин Вон: Монгол улсад цөлжилт эрчимтэй явагдаж шороон шуурга ихсэх нь БНСУ-д ч сөрөг үр дагавар дагуулж байна

Admin | 23 цагийн өмнө

Байгаль орчин, уур амьсгалын өөрчлөлтийн сайд С.Одонтуяа тэргүүтэй төлөөлөгчид энэ сарын 1-нд /2025.04.01/ БНСУ-аас Монгол Улсад суугаа Онц бөгөөд Бүрэн Эрхт Элчин сайд ноён Чой Жин Вон, нэгдүгээр нарийн бичгийн дарга Юн Жихён болон холбогдох ажилтнуудыг хүлээн авч уузлаа.

Уулзалтын эхэнд хоёр улсын байгаль орчны хамтын ажиллагаа сүүлийн жилүүдэд эрчимтэй хөгжиж буйг талууд онцлон тэмдэглэлээ. Тухайлбал, Монгол, Солонгосын хамтарсан “Ногоон хэрэм” төслийн хоёрдугаар шатыг амжилттай хэрэгжүүлж, ой нөхөн сэргээлт болон шар шороон шуургатай тэмцэх үйл ажиллагаанд бодитой хувь нэмэр оруулсныг онцоллоо. Мөн “Тэрбум мод” үндэсний хөдөлгөөний хүрээнд Солонгосын төр, хувийн хэвшлийн байгууллагуудтай хамтран шинэ техник технологи нэвтрүүлэх чиглэлээр амжилттай хамтран ажиллаж байгааг дурьдлаа. Үргэлжлүүлэн С.Одонтуяа сайдын Монгол Улс 2026 онд НҮБ-ын Цөлжилттэй тэмцэх тухай суурь конвенцын Талуудын 17 дугаар бага хурлыг зохион байгуулах бэлтгэл ажлыг ханган ажиллаж байгаа бөгөөд энэ хүрээнд БНСУ-тай хамтран ажиллах сонирхлоо илэрхийллээ. Элчин сайд Чой Жин Воны зүгээс Монгол Улсад цөлжилт эрчимтэй явагдаж буйн улмаас шороон шуурга ихсэж байгаа нь БНСУ-д хүртэл сөрөг үр дагаврыг дагуулж байгааг дурдлаа. Иймд энэхүү конвенцын 10 дугаар хурлыг БНСУ-ын Чангвон хотноо 2011 онд зохион байгуулж байсан туршлагаа хуваалцах, цөлжилттэй тэмцэх бодлого, санхүүжилт, хамтын ажиллагааны түвшинд ахиц гаргахад дэмжин ажиллахаа илэрхийлэв. Уулзалтын төгсгөлд хоёр улсын Засгийн газрын төдийгүй, хувийн хэвшлийн хамтын ажиллагааг өргөжүүлэх, хамтын ажиллагааны хүрээнд хэрэгжиж буй төсөл, арга хэмжээг эрчимжүүлэх, үр дүнд хүргэхэд онцгой анхаарч нягт хамтарч ажиллахаар санал нэгдлээ.