Tentsver.mn

Он гарсаар эхний улирлын байдлаар 37 удаагийн гамшиг, аюулт үзэгдэл, ослын дуудлага бүртгэгджээ

Admin | 22 цагийн өмнө

ОБЕГ-ын дарга, хошууч генерал Г.Ариунбуян Хойд бүсийн төв-Орхон аймгийн Онцгой байдлын газарт ажиллаж, анги, салбаруудын үйл ажиллагаатай танилцаж, алба хаагчидтай уулзалт хийлээ. Он гарсаар эхний улирлын байдлаар 37 удаагийн гамшиг, аюулт үзэгдэл, ослын дуудлага бүртгэгдсэн бөгөөд Мэдээлэл шуурхай удирдлагын төвийн 360 градус эргэдэг хөдөлгөөнт камер, дулаан мэдрэгч камер, нисгэгчгүй нисдэг төхөөрөмжөөр хяналт тавьж ажиллаж байна.

Аймгийн Боловсролын газартай хамтран "Аюулгүй амьдрах ухаан" хичээлийн сургагч багшаар ерөнхий боловсролын сургууль, хүүхдийн цэцэрлэгийн 50 гаруй багш, ажилчдыг бэлтгэж, ерөнхий боловсролын сургуулийн бие даалтын долоо хоногийн хугацаанд 19 сургуулийн 500 гаруй ахлах болон дунд ангийн сурагчдад байгууллагын үйл ажиллагаа болон сургалтын төвүүдийг танилцуулсан.

“Гамшгийн эрсдэлийг олон нийтийн оролцоотой бууруулах үндэсний хөтөлбөр”-ийн хүрээнд сар бүрийн сүүлийн долоо хоногийн пүрэв гарагт аюулгүй байдлаа шалгах өдөр болгон зарласантай холбогдуулан гаргасан хяналтын хуудсыг 8561 иргэдээр бөглүүлж, улсын хэмжээнд хамгийн өндөр хандалт авсан аймгаар шалгараад байна.

Бие бүрэлдэхүүний мэдлэг боловсрол, хувь хүний хөгжлийг дэмжих, гадаад хэл, компьютерийн мэдлэгийн түвшинг нэмэгдүүлэх ажлын хүрээнд гадаад хэл, мэдээлэл зүйн танхимыг шинээр байгуулан, аймгийн Боловсролын газар, Насан туршийн боловсролын төвтэй хамтран чиглэлийн сургалтуудыг өдөр бүр зохион байгуулан ажиллаж байгааг онцоллоо.