600 сая төгрөгийн давхар зогсоол хоёр жил ажиллаагүйн УЧИР

Admin | 2022-01-06

Улсын Нэгдүгээр төв эмнэлгийн хашаанд 16 машины багтаамжтай 4 давхар бүхий хоёр автомат зогсоол бий. Энэхүү давхар зогсоолыг 2020 оны арваннэгдүгээр сард угсарч бэлэн болгожээ. Гэвч уг давхар зогсоол ашиглагдахгүй хоёр жил болсон юм. Чухам яагаад өнөөг хүртэл ашиглалтад орохгүй байгаа талаар автомат давхар зогсоолыг оруулж ирсэн "Ай Ти Партнерс" ХХК-ийн Авто зогсоолыг хариуцсан мэргэжилтнээс тодрууллаа.

-Танай оруулж ирсэн 4 давхар автомат зогсоол угсрагдаад хоёр жил болсон ч нэг ч ажиллаагүй гэлээ. Ажиллахгүй байгаа шалтгааныг нь тодруулж болох уу?

-Энэ төрлийн зогсоол манайд өмнө нь ашиглагдаж байгаагүй учраас ашиглалтын стандарт байдаггүй юм байна. Ингээд Нийслэлийн мэргэжлийн хяналтын газартай бичиг баримтын асуудалтай байсаар өдийг хүргэлээ. Бид тус зогсоолоо ажиллуулах түр стандартын гэрчилгээгээ авсан байгаа.

-Одоо гэрчилгээгээ авчихсан юм чинь ажиллаж эхэлнэ гэсэн үг үү?

-Мэргэжлийн хяналтын газраас ажиллуулах зөвшөөрлөө авчихвал босоо эргэлтэд машины зогсоолоо хэвийн үйл ажиллагаанд оруулахад бэлэн. Мөн тохирлын гэрчилгээ буюу бүтээгдэхүүн нь тогтоосон шаардлагад нийцсэнийг тодорхойлсон баримт бичгээ ч мөн адил өгсөн.

-Угсралт бүрэн хийгдсэн. Ажиллуулахад ямар ч асуудалгүй байгаа юм байна гэж ойлголоо?

-Тийм ээ. Угсралт бүрэн хийгдээд хоёр жил болж байна.

      Давхар зогсоолыг нийт 600 сая төгрөгөөр оруулж иржээ

Тус эмнэлгийн зогсоол үргэлж дүүрэн байдаг бөгөөд эмнэлгээр үйлчлүүлж буй иргэд автомашинаа тавих газаргүй хүндрэлтэй байдаг. Хэрэв тус зогсоол ашиглалтад орвол 16 машин нэг дор хүлээн авах боломжтой юм. Уг давхар "Smart parking" зогсоолыг "Ай Ти Партнерс" ХХК оруулж ирсэн бөгөөд угсралтыг "NETIS Elevator" компани гүйцэтгэсэн юм байна. Дөрвөн давхар бүхий нэг зогсоол 8 машин багтах бөгөөд нэгжийн үнэ 300 сая төгрөгөөр оруулж иржээ. Тэгэхээр нийт 600 сая төгрөгийн зогсоол хоёр жилийн хугацаанд стандартгүй гэх шалтгаанаар нэг ч ажиллаагүй гэсэн үг.

                                                                                                                      А.Мөнхнаран