Tentsver.mn

Б.Чинзориг, Б.Мишээлт нар медалийн болзол хангалаа

Admin | 2023-05-11

Ташкентэд болж сонирхогчдын боксын дэлхийн аварга шалгаруулах тэмцээний шөвгийн наймын тоглолтууд өчигдөр болж, медалийн болзол хангасан тамирчдын нэрс тодорлоо. Монголын ширэн бээлийтнүүд хоёр медаль хүртэх нь. 63.5 кг-ын жинд хүч үзэж буй Б.Чинзориг медалийн төлөөх тулаанд Кубын алдарт боксчин, дэлхийн гурван удаагийн аварга Лазаро Алварезийг 4:1 харьцаатай буулгаж авлаа. Армийн дэлхийн аварга, Ази тивийн аварга Б.Чинзориг маань ийнхүү олон жилийн мөрөөдлөө биелүүлж бөмбөрцгийн тэмцээний медаль зүүхээр болов. Тэрбээр зургаа дахь ДАШТ-дээ оролцож, медалийн төлөөх тулаанд гурвантаа шалгарсны эцэст ийн зорилгодоо хүрч байна.

Медалийн төлөөх тулаанд шалгарсан 67 кг-ын Б.Мишээлт медалийн төлөө Венесуэлийн тамирчинтай тулалдаж эхний үед 5:0 хожигдсон ч хоёрдугаар раундад маш сайн тулалдлаа. Хоёрдугаар үеийн төгсгөлд Венесуэлийн тамирчны хөмсөг задарч шүүгч тоглолтыг зогсоож, ялалтыг манай тамирчинд өгсөнөөр хүрэл медалийн болзлыг хангалаа.

Манай хоёр тамирчин маргааш хагас шигшээд тулалдана. Б.Чинзориг мөнгөн медалийн төлөө Тажикистаны боксчин, Ази тивийн аварга Б.Усмоновтой тоглох аж. Б.Мишээлт рингэний эзэн орны Асадулла Мужинхожаевтай нударга зөрүүлнэ.

Хагас шигшээ тулаан буюу мөнгөн медалийн төлөөх тоглолтууд маргааш баасан гарагт болно. Нийт 18 орны боксчид медалийн болзол хангаад байна.

Хагас шигшээ буюу мөнгөн медалийн төлөөх тулаан хийхээр шалгарсан орны боксчдын тоо:

Узбекстан - 9

Куба - 6

ОХУ - 6

Казахстан - 5

Энэтхэг - 3

Франц - 3

Испани - 3

Гүрж - 3

Монгол - 2

Бразил - 2