Tentsver.mn

Нийслэлийн 2023 оны төсвийн төслийг өргөн барилаа

Admin | 2022-11-22

Нийслэлийн Засаг дарга бөгөөд Улаанбаатар хотын захирагч Д.Сумъяабазар Нийслэлийн ИТХ-ын дарга Ж.Батбаясгаланд Нийслэлийн 2023 оны төсөв батлах тухай тогтоолын төслийг өргөн барилаа. Мөн нийслэлийн ИТХ-ын 2022 оны 65 дугаар тогтоолд өөрчлөлт оруулах, 2022 оны газар зохион байгуулалтын төлөвлөгөөний биелэлт, ирэх оны газар зохион байгуулалтын төлөвлөгөөний төслийг хамтад нь өргөн барьсан юм.

Нийслэлийн Засаг дарга Д.Сумъяабазар энэ үеэр олон улсад болон манай оронд эдийн засгийн амаргүй цаг үе тохиож байна. Цар тахлын улмаас хөрш орнуудын барьж буй бодлого, Орос Украйны зэвсэгт мөргөлдөөнөөс үүдэлтэй тээвэр ложистикийн үнийн өсөлт зэрэг нь аж ахуйн нэгж, бизнес эрхлэгч, ард иргэдийн орлогод сөргөөр нөлөөлж байгаа.

Хэдийгээр нөхцөл байдал хүнд байгаа ч бид нийслэлийн төсвийг өөдрөгөөр төсөөлж, нөөц хувилбарыг боловсрууллаа гэдгийг онцолсон юм. Харин Нийслэлийн ИТХ-ын дарга Ж.Батбаясгалан “Нийслэл Улаанбаатар хотын төсөв аж ахуйн нэгж, иргэдийн үйлчилгээ, түүний орлогоос бүрддэг онцлогтой. Гэвч цар тахлын нөхцөл байдал энэ салбарт сөргөөр нөлөөлж, түүнээс үүдэлтэй эдийн засгийн хүндрэл үргэлжилсээр байна. Тиймээс 2023 онд нийслэл хот ажлын байрыг нэмэгдүүлэх, төр хувийн хэвшлийн түншлэлийг дэмжиж ажиллах шаардлагатай” гээд хуулийн хүрээнд төсвийн төслийг Нийслэлийн ИТХ хэлэлцэн батална гэсэн юм.

Дээрх төслүүдтэй хамт Үндэсний соёл амралтын хүрээлэн ХХК-ийн бүтээн байгуулалтын ажилтай холбогдуулан Сүхбаатар дүүргийн 1 дүгээр хорооны нутаг дэвсгэрт НЗДТГ-ын эзэмшиж буй10.2 га газрыг цэцэрлэгт хүрээлэн, ногоон байгууламжийн зориулалтаар ашиглах нөхцөлийг бүрдүүлэн тохижуулах зорилгоор орон нутгийн тусгай хамгаалалтад авах тухай тогтоолын төслийг өргөн барьсан юм.