Tentsver.mn

Ерөнхийлөгч нэр хүндээ хамгаалж хуулийн байгууллагад хандана гэв

Admin | 2023-01-10

Зарим хэвлэл мэдээллийн хэрэгслээр нүүрсний хулгай болон УБТЗ-ын "хурган" даргыг цагдан хорьсонтой холбогдуулан энэ бүхний ард АТГ болон Ерөнхийлөгч У.Хүрэлсүх нар холбоотой байж магадгүй гэсэн мэдээлэл гарсан. Тэгвэл Монгол Улсын Ерөнхийлөгчийн Тамгын газар уг мэдээллийг үгүйсгэж мэдэгдэл гаргаад байна. Мэдэгдлийг бүтнээр нь хүргэж байна.

"Сүүлийн үед хэвлэл мэдээллийн хэрэгсэл, нийгмийн сүлжээгээр Монгол Улсын Ерөнхийлөгчийн нэр хүндэд ноцтой халдаж, хүнд гэмт хэрэгт илтэд гүтгэсэн мэдээллийг зохион байгуулалттай, улс төрийн зорилгоор тараах боллоо.

Монгол Улсын Ерөнхийлөгч сүүлийн жилүүдэд байгалийн баялаг, хууль бусаар алдсан орд газрууд, үйлдвэрээ, төр ард түмний мэдэлд олон нийтийн хяналтад оруулах тэмцэл хийж ирсэн билээ.

Нүүрсний хулгай, төмөр замын авлига зэрэг хууль бус үйлдэлтэй Монгол Улсын Ерөнхийлөгч ямар ч холбоогүй гэдгийг хариуцлагатайгаар мэдэгдэж байна.

Улс орны байгалийн баялгийг хулгайлж, төр, ард түмнийг хохироож ирсэн гэмт этгээдүүд энэхүү шударга ёсны тэмцлийг зогсоох, манлайлан удирдаж буй хүмүүсийг нь харлуулах, нэр хүндийг унагах бүхий л оролдлогыг тасралтгүй хийсээр байна.

Төрийн тэргүүний нэр хүнд хуулиар хамгаалагддаг тул гүтгэлэг тарааж буй үйлдлүүдийг шалгуулахаар хууль хяналтын байгууллагад хандаж байгаа болно.

Монгол Улсын Ерөнхийлөгч байгалийн баялаг, ард иргэдийн боломжоос хулгайлсан аливаа гэм буруутай этгээдүүд, авлига, хээл хахууль, хууль бус үйлдлүүдтэй хийж буй тэмцлээс ухрахгүй гэдгийг мэдэгдэж байна.

Монгол Улсын Ерөнхийлөгчийн Тамгын газар 2023.01.11" гэжээ.