Tentsver.mn

Нүүрсний хулгайд холбогдсон УИХ-ын гишүүн Д.Бат-Эрдэнийн нэр хаачив

Admin | 2023-02-28

Авлигатай тэмцэх газраас өчигдөр мэдээлэл хийж нэр бүхий УИХ-ын зургаан гишүүнийг нүүрсний хулгайн хэрэгтэй холбоотойгоор яллагдагчаар татаж буйг зарласан. Тодруулбал, УИХ-ын гишүүн А.Адъяасүрэн, Т.Аюурсайхан, Ш.Раднаасэд, Ж.Мөнхбат, Н.Наранбаатар, Б.Энх-Амгалан нарыг яллагдагчаар татжээ.

АТГ-аас оны өмнөхөн буюу өнгөрсөн оны арванхоёрдугаар сард нүүрсний хулгайтай холбогдсон нийт 17 албан тушаалтны нэрийг зарласан байдаг. Уг жагсаалтад УИХ-ын гишүүн А.Анандбазар, А.Адъяасүрэн, Д.Бат-Эрдэнэ, Ц.Сэргэлэн, Н.Наранбаатар, Б.Баттөмөр, Ш.Раднаасэд нарыг зарлаж байв. Тэгвэл эдгээр гишүүдээс А.Анандбазар, Д.Бат-Эрдэнэ, Б.Баттөмөр, Ц.Сэргэлэн нарын нэр зарлагдсангүй. Уг гишүүдийг хуулийн байгууллага шалгаж байна уу, шалгалтын гадна үлдээв үү гэдэг асуулт гарч ирж байна. Хамгийн хачирхалтай нь УИХ-ын гишүүн Д.Бат-Эрдэнэ яллагдагчаар татагдах гишүүдийн тооны гадна үлдэв. Учир нь өнгөрсөн сард УИХ-ын гишүүн, ХНХ-ын сайд Т.Аюурсайхан, УИХ-ын гишүүн Д.Бат-Эрдэнэ нарыг яллагдагчаар татах саналыг прокурорын байгууллагад хамт хүргүүлсэн байдаг. Удаа ч үгүй УИХ-ын гишүүн, ХНХ-ын сайд Т.Аюурсайхан бүрэн эрхээсээ татгалзах хүсэлтээ өгсөн. Харин Өмнөговь аймгаас АН-ыг төлөөлж гурван ч удаа сонгогдсон, уул уурхайн бизнесийн магнат гэж нэрлэгддэг олноо "Ажнай" гэгдэх Д.Бат-Эрдэнэ гишүүн нүүрсний хулгайтай холбогдоогүй гэдгээ илэрхийлсээр ирсэн. Ямартай ч түүнийг АТГ-аас зарласан яллагдагчаар татах гишүүдийн нэр дунд байгаагүй ч Эрүүгийн цагдаагийн алба нүүрсний хулгайтай хэрэгт холбогдуулан шалгаж байгаа гэх мэдээлэл байна. Гэхдээ тойргын энэ удаагийнх шиг дахиад үлдэх магадлал өндөр болов уу.

Нүүрсний хулгайд холбогдсон УИХ-ын гишүүн Д.Бат-Эрдэнийн нэр хаачив

ЭНЭ МЭДЭЭНД ӨГӨХ ТАНЫ ҮНЭЛГЭЭ?

Холбоотой мэдээ

Нийт сэтгэгдэл (0)