Tentsver.mn

Сүүлийн 10 жилд банкны салбарын ашиг тав дахин өсжээ

Admin | 2023-05-12

Өнгөрсөн 10 жилийн хугацаанд банкны салбарын нийт хөрөнгө дөрөв дахин, ББСБ-ынх 14 дахин өссөн байна. Хурдацтай хөгжиж байгаа хоёр салбарыг харьцуулбал, өнгөрсөн оны эцсээр банкны салбарын цэвэр ашиг 1 их наяд төгрөг болсон бол ББСБ-уудын цэвэр ашиг 300 тэрбум төгрөгт хүрэв. Улмаар сүүлийн 10 жилд банкны салбарын ашиг 5 дахин, ББСБ-ын ашиг 16.8 дахин тус тус өссөн аж.

Банкнуудын харилцагчдад олгосон цэвэр зээлийн хэмжээ 10 жилийн өмнөхөөс гурав дахин нэмэгдэж 20.3 их наяд төгрөгт хүрчээ. Харин ББСБ-ын цэвэр зээл 16.7 дахин нэмэгдэж 2.5 их наяд төгрөгт хүрсэн байна. Үүний дотор ББСБ-уудын цахим зээлийн хэмжээ сүүлийн гурван жилд 5.5 дахин нэмэгдэж 1.2 их наяд төгрөгт хүрсэн.

2022 онд банкны салбар нь нийт хөрөнгийнхөө 2 хувийг, ББСБ-ын салбар 9 хувийг цэвэр ашиг болгон хувиргажээ. Үүнээс харахад ББСБ-уудын нийт хөрөнгийн өгөөж өндөр байгаа нь ашигт ажиллагааны өсөлттэй холбоотой байв. Хувь нийлүүлсэн хөрөнгийн өгөөж нь ББСБ-уудынх 14 хувь байгаа боловч банкнууд 21 хувь байж илүүрхлээ. Харин цэвэр ашгийн маржинг тооцож үзэхэд банкнуудынх 27 хувь, ББСБ-уудынх 45 хувь байна. Энэ нь банкнуудын зардал илүү өндөр байгааг харуулж буй.

Финтекийн тусламжтай ББСБ-ууд огцом хурдтай өсөж банкны салбарын чамгүй хэсгийг эзлэх болсон. Харин сүүлийн жилүүдэд нео, дижитал банкнууд гэх мэтээр банкнууд дижитал технологийн шийдэлдээ ихээр хөрөнгө оруулж байна.