Tentsver.mn

ТБХ: Хуулийн төслүүдийн эцсийн хэлэлцүүлгийг хийлээ

Admin | 2 Жилийн өмнө

Улсын Их Хурлын Төсвийн байнгын хорооны өнөөдрийн (2021.12.24) хуралдаанаар хоёр асуудал хэлэлцэн шийдвэрлэв. Хуралдааны эхэнд Байнгын хорооны дарга Ч.Хүрэлбаатар гишүүдийн ирц, хэлэлцэх асуудлын дарааллыг танилцуулсны дараа Гаалийн тариф, гаалийн татварын тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийв.

Хуралдаанд Зам, тээврийн хөгжлийн Дэд сайд Ж.Бат-Эрдэнэ, Иргэний нисэхийн ерөнхий газрын дарга С.Мөнхнасан болон холбогдох албан тушаалтнууд оролцсон.

УИХ-ын чуулганы нэгдсэн хуралдааны анхны хэлэлцүүлгээр олонхын дэмжлэг авсан саналуудыг нэмж тусган, эцсийн хэлэлцүүлэгт бэлтгэсэн хуулийн төсөлтэй холбогдуулан асуулт асууж, санал хэлэх гишүүн байсангүй. Иймд энэ талаарх Байнгын хорооны санал, дүгнэлтийг Улсын Их Хурлын гишүүн Ш.Раднаасэд чуулганы нэгдсэн хуралдаанд танилцуулахаар тогтлоо.

Үргэлжлүүлэн Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг явуулсан.

Хуулийн төслийн эцсийн хэлэлцүүлэгтэй холбогдуулан асуулт асууж, санал хэлэх гишүүн байгаагүй тул энэ талаарх Байнгын хорооны санал, дүгнэлтийг Улсын Их Хурлын гишүүн Ж.Батсуурь чуулганы нэгдсэн хуралдаанд танилцуулахаар тогтов гэж УИХ-ыН Хэвлэл мэдээлэл, олон нийттэй харилцах хэлтсээс мэдээллээ.